ताप्लेजुङ प्रधानमन्त्रीको कार्यक्रम स्थगित
संवाददाता
२ मंसिर, ताप्लेजुङ ,
प्रधानमन्त्री केपी शर्मा ओली चीनको स्वशासित क्षेत्र तिब्बतसँगको सीमा निरीक्षणसहितको कार्यक्रमका लागि ताप्लेजुङ पुग्ने कार्यक्रम स्थगित भएको छ। ५ मंसिर बिहान प्रधानमन्त्री ताप्लेजुङ पुग्ने भनेर ताप्लेजुङका प्रमुख जिल्ला अधिकारी झरेन्द्रप्रसाद चापागाईंलाई जानकारी आएको थियो।
प्रधानमन्त्री ताप्लेजुङ आउने भएपछि सुरक्षाको व्यवस्था मिलाउन थालिएको थियो। तर, प्रधानमन्त्रीको सचिवालयबाट मंगलबार ताप्लेजुङको कार्यक्रममा आउने समय स्थगन भएको आफूलाई जानकारी आएको प्रजिअ चापागाईंले बताए।
जिल्लाको उत्तरी क्षेत्र र तिब्बतको सीमा क्षेत्र टिपताला भञ्ज्याङको निरीक्षण तथा फक्ताङ्लुङ गाउँपालिका–६ लेलेपको घुन्सामा निर्माण गरिएको स्वास्थ्य एकाइ कार्यालय उद्घाटनको कार्यक्रममा सहभागी हुन प्रधानमन्त्री ५ मंसिरमा ताप्लेजुङ पुग्ने तयारी भएको थियो।
यता, विश्वको तेस्रो अग्लो हिमाल कञ्चनजङ्घा हिमालको फेदी तथा तीन हजार ५०० मिटरमा अवस्थित घुन्सा गाउँमा प्रधानमन्त्री ओली आउने खबरले खुशीका साथ स्वागतद्वार निर्माण तथा गाउँ सरसफाइ कार्यक्रमस्थल सजावट सबै काम सकेको घुन्सा गाउँका स्थानीय टासीतेन्जी शेर्पाले बताए।
प्रधानमन्त्री ओलीसमक्ष घुन्सावासीले घुन्सा गाउँको विकास निर्माण तथा राज्यबाट थप सेवा सुविधाको मागपत्रसमेत तयारी गरिसकेको शेर्पाले बताए।
