जलन उपचार केन्द्र स्थापना गर्न रोटरी भेट्रान्स फुटबल प्रतियोगिता हुने
संवाददाता
जलन उपचार केन्द्र स्थापनाका लागि रोटरी क्लबले भेट्रान्स फुटबल प्रतियोगिता गर्ने भएको छ । रोटरी क्लब अफ मकवानपुरको आयोजनामा भोलि (सोमबार)देखि प्रतियोगिता हुने भएको हो ।
४० वर्षदेखि माथि उमेर समूहका खेलाडीहरूले सहभागिता जनाउन पाउने प्रतियोगिता ११ ए साइडको हुनेछ । यसअघि २०७२ र ०७३ सालमा खेल आयोजना गरेको रोटरीले लामो समयपछि फेरि प्रतियोगितालाई निरन्तरता दिन लागेको हो । भदौ ३१ गतेसम्म सञ्चालन हुने प्रतियोगिताको विजेताले २ लाख २ हजार २२२ रुपैयाँ र उपविजेताले एक लाख १ हजार १११ रुपैयाँसहित ट्रफी, मेडल र प्रमाणपत्र प्राप्त गर्नेछ ।
प्रतियोगिताको उत्कृष्ट प्रशिक्षकले १० हजार प्राप्त गर्नेछन् भने उत्कृष्ट खेलाडी, गोलरक्षक, डिफेन्डर, मिडफिल्डर र फरवार्डले जनही नगद ५ हजार रुपैयाँसहित ट्रफी प्राप्त गर्ने रोटरी क्लब अफ मकवानपुरका अध्यक्ष अनिल अग्रवालले बताए ।
‘प्रतियोगिताको सम्पूर्ण तयारी पूरा भएको छ । हेटौंडा उपमहानगरपालिकाका मेयर मीनाकुमारी लामाबाट खेलको उद्घाटन हुनेछ’, उनले भने ।
शिक्षा, स्वास्थ्य तथा खानेपानीको क्षेत्रमा कार्य गर्दै आएको रोटरीले खेलकुदको क्षेत्रमा समेत काम गरिरहेको छ । हेटौंडा ५ स्थित पिप्ले–क्याम्पा रंगशालामा हुने प्रतियोगितालाई आगामी वर्ष पनि निरन्तरता दिँदै जाने लक्ष्य रहेको खेल संयोजक मोहन ढकालले बताए ।
रोटरी क्लब अफ मकवानपुरको आयोजनामा हुन लागेको प्रतियोगितामा पिप्ले युवा क्लब सहआयोजक र रोटर्याक्ट क्लब अफ मकवानपुरको सहकार्य रहनेछ । प्रतियोगीताका लागि करिब १६ लाख १८ हजार रुपैयाँ खर्च हुने अनुमान रहेको आयोजकको भनाई छ । पहिलो र दोस्रो संस्करणको उपाधि चितवन भेट्रान्स क्लब चितवनले जितेको थियो ।
