बागमती प्रदेश सरकारको सहकारी तथा गरिबी निवारण मन्त्रालयले तीनवटा सहकारीलाई समस्याग्रस्त सहकारी घोषणा गरेको छ । आइतबार सहकारी तथा गरिबी निवारणमन्त्री मदुकुमार श्रेष्ठले मन्त्रीस्तरीय निर्णय गर्दै काठमाडौंका तीनवटा सहकारीलाई समस्या ग्रस्त घोषणा गरेका हुन्।

मन्त्री श्रेष्ठका अनुसार काठमाडौंको नेसनल नमोबुद्ध बचत तथा ऋण सहकारी संस्था लिमिटेड, सुमेरु सेभिङ एन्ड क्रेडिट कोअपरेटिभ लिमिटेड र लालीगुराँस बचत तथा ऋण सहकारी संस्था लिमिटेडलाई समस्याग्रस्त घोषणा गरिएको हो ।

राजकुमार तामाङ अध्यक्ष रहेको नेसनल नमोबुद्ध सहकारीका ७२ बचतकर्ताले बचत फिर्ता माग गर्दै उजुरी दिएका थिए । सोही उजुरीको आधारमा १७ असोज, २२ कात्तिक र २० चैत ०८०मा पत्राचार गरी छलफलका लागि बोलाइएको थियो । महाशाखासँगको छलफलका क्रममा सो सहकारीले बचत फिर्ताको लागि ३ वैशाख ०८१ मा कार्ययोजनासमेत पेस गरेको थियो । तर, उक्त कार्ययोजनासहित काम नभएपछि समस्याग्रस्त घोषणा गरिएको हो ।

तत्काल बचतकर्ताहरूले नेसनल नमोबुद्ध सहकारीसँग १२ करोड २७ लाख रुपैयाँ बचत फिर्ताको माग गरेका छन् भने सहकारीसँग एक अर्ब ५२ करोड रुपैयाँ दायित्व देखिएको मन्त्रालयले जनाएको छ । यस्तै, सहकारीसँग जम्मा ७० करोड रुपैयाँको सम्पत्ति देखिएको छ।

वीरेन्द्र महर्जन अध्यक्ष रहेको सुमेरुले दुई अर्ब २५ करोड १४ लाख रुपैयाँ बचत फिर्ता गर्न नसकेको मन्त्रालयले जनाएको छ । सुमेरुले बचत फिर्ता नदिने, संस्थाको आर्थिक कारोबार उपलब्ध नगराउनेलगायतका कार्य गरेकाले समस्याग्रस्त सहकारी घोषणा गरिएको सहकारी महाशाखा बागमती प्रदेशका रजिस्ट्रार कुमार तामाङले जानकारी दिए ।

सो सहकारीका विषयमा सहकारी विभागको २४ थान पत्र, ललितपुर महानगरपालिकाको गत ०८० माघमा प्राप्त पत्रको साथ चार बचतकर्ताको उजुरीको आधारमा समस्या ग्रस्त सहकारी घोषणा गरिएको उनले बताए ।

विभाग र मन्त्रालयको समन्वयमा सुमेरुलाई १९ र २४ भदौ, ११ मंसिर, ८ माघ र २९ फागुनमा पत्राचार गरेर छलफलमा बोलाउँदा समेत बेवास्ता गर्ने गरेको र बचतकर्ताको रकम फिर्ताको कार्ययोजना समेत पेस गर्न नसकेको उनको भनाइ छ । सो सहकारीको १३ अर्बभन्दा बढीको सम्पत्ति रहेको अनुमान गरिएको छ भने सात अर्बभन्दा बढीको दायित्व रहेको जनाइएको छ ।

यस्तै, धनबहादुर तामाङ अध्यक्ष रहेको लालीगुराँस सहकारीलाई ९७२ बचतकर्ताको उजुरीको आधारमा समस्याग्रस्त घोषणा गरिएको हो । एक अर्ब ६१ करोड ९९ लाख ७५ हजार बचत फिर्ता माग गर्दै उजुरी परेको थियो । तीन हजार २३८ सेयर सदस्य रहेको उक्त सहकारीको बचत रकम तीन अर्ब ८६ रकोड १४ लाख रुपैयाँ रहेको छ । सहकारीको लगानी भने तीन अर्ब १६ करोड २५ लाख रुपैयाँ देखिएको छ ।

समस्याग्रस्त सकारी घोषणा गरिएका सहकारीहरूको व्यवस्थापन प्रदेश सरकारअन्तर्गतको समस्याग्रस्त सहकारी व्यवस्थापन समितिको कार्यालयले गर्नेछ । प्रदेश सरकारले यसअघि समस्याग्रस्त सहकारी घोषणा गरिएको काठमाडौंको कीर्तिपुरस्थित दर्शन बचत तथा ऋण सहकारी संस्था लिमिटेड र सिभिल सेभिङ एन्ड क्रेडिट को–अपरेटिभ लिमिटेडको व्यवस्थापनको काम गरिरहेको छ ।