वनका सचिवले मयूरधाप औद्योगिक क्षेत्र तुहाउन खोजे: बर्तौला

एमालेका मुख्य सचेतक महेशकुमार बर्तौलाले वनका सचिवहरूले मयूरधाप औद्योगिक क्षेत्रको योजना तुहाउन खोजेको आरोप लगाएका छन्। बर्तौलाले मध्यवर्ती क्षेत्रको नाममा वनका सचिवले औद्योगिक क्षेत्र निर्माणको योजना तुहाउने काम गरिरहेको बताएका हुन्।

हेटौँडामा शनिबार पत्रकारहरूसँगको भेटघाटमा मुख्य सचेतक बर्तौलाले देशको अर्थतन्त्र र नागरिकको रोजगारीसँग जोडिएको गौरवको आयोजना मयूरधापको औद्योगिक क्षेत्रलाई वन र निकुञ्जको विभिन्न प्रावधान लगाएर रोक्न खोजेको बताए।

मन्त्रिपरिषदबाट पारित गरी सबै प्रक्रिया पूरा गरी कार्यान्वयनको चरणमा रहेको उक्त योजनाको औचित्य र आवश्यकताको विषयमा प्रश्न गर्दै वनको सचिवस्तरका कर्मचारीले रोक्ने काम गरेको उनको भनाइ छ।

‘गौरवको आयोजना सञ्चालनमा निकुञ्ज र वनका कर्मचारीको दादागिरी देखिएको छ। मयूरधाप औद्योगिक क्षेत्रको योजना तुहाउने रणनीतिअनुसार वनका सचिवले सूचना जारी गरिएको छ,’ उनले भने, ‘२०७२ सालमा घोषणा भएर विभिन्न प्रक्रियासहित जग्गा भोगाधिकारसमेत पाएर अघि बढेको सो आयोजनाको औचित्य र आवश्यकताबारे प्रश्न गर्दै वन र निकुञ्जको कर्मचारीबाट पत्र जारी गरिएको छ।’

औद्योगिक क्षेत्रका पुनः सम्भाव्यता अध्ययन गर्नुपर्ने भन्दै गत पुस ९ मा सचिवस्तरको निर्णयसहित सार्वजनिक सूचना जारी हुनुले देशको सिस्टममा ब्युरोक्रेसीको दबदबालाई स्पष्ट पारेको उनको भनाई छ। मध्यवर्तीको नाममा लगातारको असहयोग सह्य नहुने उनले चेतावनी दिए।

मध्यवर्ती क्षेत्रमा परेको भन्दै मयूरधाप औद्योगिक क्षेत्र सञ्चालन प्रक्रिया अगाडि बढाउन अवरोध हुने गरी वन मन्त्रालयबाट पत्र प्रेषित हुनु दुःखद रहेको उनको भनाइ छ। मयूरधाप औद्योगिक क्षेत्र सञ्चालनमा ल्याउने र नयाँ उद्योग कलकारखाना स्थापना गरी रोजगारीका अवसरहरू सिर्जनाको वातावरण बनाउन सक्रिय हुनुपर्ने उनले बताए।

राजनीतिक नेतृत्व नीतिगत निर्णयविपरीत कर्मचारीहरूबाट औद्योगिक क्षेत्रको विषयमा असहयोग हुनु उपयुक्त नरहेको उनले बताए। सो विषयमा जनस्तरबाट समेत बलियो खबरदारी अपरिहार्य रहेको मुख्य सचेतक बर्तौलाले बताए। मयूरधापमा औद्योगिक क्षेत्र निर्माण गरेर नागरिकको आयस्तर सुधार गर्न युवाहरूलाई रोजगारीको अवसर दिनुपर्ने उनको भनाइ छ। मयूरधाप औद्योगिक क्षेत्र सञ्चालनले रोजगारी सिर्जना मात्र नभई राज्यलाई अर्बौ रुपैयाँ राजस्व संकलनको अवस्था निर्माण हुने उनले बताए।