हेटौँडा सिमेन्ट उद्योगको दुर्दशा : ६ महिनामा २६ दिन मात्रै सञ्चालन

निरन्तर घाटा व्यहोरिरहेको हेटौँडा सिमेन्ट उद्योग असोजदेखि पूर्ण रूपले बन्द हुँदा थप मारमा परेको छ । बिग्रिएका पुराना मेसिन मर्मत गरेर सञ्चालन गर्नुको सट्टा सामान्य विद्युत् कटौतीलाई बहाना देखाएर उद्योग निरन्तर बन्द छ ।

एकातिर अपरेटिङ खर्च धान्न नसक्नु र अर्कातिर पुराना उपकरण बारम्बार बिग्रनु उद्योगको नियति बनेको छ । जसका कारण उद्योग चालू आर्थिक वर्षमा जम्मा २६ दिन मात्रै चलेको छ । चालू आर्थिक वर्षको ६ महिनामा साउनमा १ दिन, भदौमा १८ दिन र असोजमा सात दिन गरी जम्मा २६ दिन चलेको हो ।

चालू आर्थिक वर्षमा साउनमा एक दिन चलेर बन्द भएको उद्योग १४ भदौबाट सञ्चालनमा आएको थियो । तर, ७ असोजमा किलमा समस्या आएपछि बन्द भएको उद्योग अहिलेसम्म चल्न सकेको छैन ।

सरकारले हालै निजीकरणका लागि सिफारिस गरेका नौवटा सरकारी उद्योगमा हेटौँडा उद्योगलाई समेत समेटेको थियो । पटक–पटक बन्द हुँदै आएको हेटौँडा सिमेन्टले उद्योग सञ्चालनका लागि ठुलो रकम निकासा मागेपछि सरकारले निजीकरण गर्ने निर्णय गरेको थियो । तर, अहिलेसम्म पनि हेटौँडा सिमेन्ट उद्योगको बारेमा कुनै निर्णय हुन सकेको छैन ।

संघीय सरकारका उद्योग वाणिज्य तथा आपूर्तिमन्त्री दामोदर भण्डारीले समेत गत असोजमा उद्योगको निरीक्षण गर्दै हेटौँडा सिमेन्टलाई सरकारले चलाउन नसक्ने, तर निजी क्षेत्रलाई भाडामा दिन सक्ने आशय व्यक्त गरेका थिए । उनले उद्योग सञ्चालनको विभिन्न मोडेलको विषयमा छलफल भइरहेको जानकारी दिँदै छिट्टै निष्कर्षमा पुग्ने दाबी गरेका थिए ।

यता उद्योगका महाप्रबन्धक वसन्तराज पाण्डे भने उद्योग मंसिरदेखि विद्युत् प्राधिकरणको अघोषित लोडसेडिङका कारण सञ्चालनमा आउन नसकेको बताउँछन् । उनका अनुसार उद्योगलाई उपलब्ध गराइएको ग्रिडमा गत मंसिरदेखि बिहान र बेलुका गरी ६ घण्टा लोडसेडिङ हुँदै आएको छ । विद्युत् प्राधिकरणले घोषित रूपमा लोडसेडिङ नगरे पनि बिहान र बेलुका तीनतीन घण्टा विद्युत् अवरुद्ध हुँदै आएको प्रबन्ध निर्देशक पाण्डेको भनाइ छ । ‘दसैँअघि उपकरणमा समस्या आएपछि बन्द भएको उद्योग मर्मत गरेर तिहारपछि सञ्चालन गर्ने तयारी थियो । मर्मतका लागि सोचेभन्दा बढी समय लाग्दा पनि हामीले तोकेको समयमै उद्योग सञ्चालन गर्न सकेनौँ । तर, विद्युुत् प्राधिकरणले मंसिरदेखि अघोषित रूपमा लोडसेडिङ गरिदिँदा उद्योग अहिले पनि बन्द छ,’ उनले भने ।

प्रबन्ध निर्देशक पाण्डेले उद्योग सञ्चालन गर्न सके करिब एक लाख बोरा सिमेन्ट उत्पादन गर्न सकिने कच्चा पदार्थ मौज्दात रहेको जानकारी दिए । उनले हाल उद्योगसँग एक बोरा पनि मौज्दात सिमेन्ट नरहेको बताए ।

उनले नियमित विधुत सप्लाईका लागि प्राधिकरणका कार्यकारी निर्देशक कुलमान घिसिङलाई भेटेरै आग्रहसमेत गरेको बताए । सुक्खा मौसम सुरु भएकाले पर्याप्त मात्रामा विद्युत् उत्पादन हुन नसकेको र भारतबाट समेत बिजुली ल्याउन ढिलाइ भएका कारण उद्योगहरूलाई आवश्यक बिजुली दिन नसकेको कार्यकारी निर्देशक घिसिङले जानकारी गराएको उनले बताए ।