परिवर्तनपछिको उपलब्धिहरूलाई संस्थागत गर्न सरकार दृढ : मन्त्री सिंह
संवाददाता
उपप्रधान तथा सहरी विकासमन्त्री प्रकाशमान सिंहले व्यवस्था परिवर्तनपछिको उपलब्धिहरूलाई संस्थागत गर्न सरकार दृढ रहेको बताएका छन्। उनले व्यवस्थाका उपलब्धिहरूलाई संस्थागत गर्दै सकारात्मक ढंगबाट अघि बढ्नुपर्ने भएकोले सरकारको ध्यान त्यसैमा केन्द्रित भएको बताए ।
बिहीबार कांग्रेस मकवानपुरले आयोजना गरेको कार्यकर्ता भेटघाट कार्यक्रमलाई सम्बोधन गर्दै मन्त्री सिंहले राजनीतिक परिवर्तन जोगाउन आर्थिक समृद्धिलाई ध्यान दिनुपर्ने बताए । आर्थिक समृद्धिलाई नागरिकहरूले महसुस गरेको खण्डमा व्यवस्थाले स्थायित्व प्राप्त गर्ने उनको भनाइ छ ।
मन्त्री सिंहले नागरिकहरूका लागि लक्षित गरी संविधानले निर्दिष्ट गरेको अधिकारहरू सहज उपभोगमा सरकारले काम गरिरहेको दाबी गरे । नागरिकका आवश्यकता र चाहना पूरा भए मात्र राजनीति सही ट्रयाकमा आउने भएकाले त्यसमा कांग्रेसले विशेष ध्यान दिन जरुरी रहेको उनको भनाइ थियो ।
उनले वर्तमान समयमा नागरिकहरूले रोजगारी र विकास निर्माणको अपेक्षा गरिरहेको र बिदेसिने वातावरणको अन्त्य चाहेको बताए । सो चाहनाअनुरूप सरकारले काम गरिरहेको उनको भनाइ छ । मन्त्री सिंहले राजनीतिक दलको ऊर्जा कार्यकर्तामा रहेकाले आपसी समझदारी कायम गरी अघि बढ्नुपर्नेमा जोड दिए । पार्टीभित्रको विवाद समाधान गर्न माथिल्ला संरचनाहरूसँगको समन्वयमा छलफल र सहकार्यमा जोड दिन उनले निर्देशन दिए ।
पार्टी संगठन बलियो बनाउन आमकार्यकर्तालाई एकताबद्ध गर्नुपर्ने भएको कांग्रेसको गति त्यसतर्फ हुन जरुरी रहेको मन्त्री सिंहले बताए ।कार्यक्रममा कांग्रेस केन्द्रीय सदस्य एवं बागमती प्रदेशका आर्थिक मामिला तथा योजनामन्त्री कुन्दनराज काफ्ले, बागमती प्रदेश सभापति इन्द्रबहादुर बानियाँ, कांग्रेस मकवानपुर सभापति बुद्ध लामा, पूर्वसभापति रघुरमण न्यौपाने, कांग्रेस मकवानपुरका उपसभापति एवं बकैया गाउँपालिका अध्यक्ष धर्मराज लामिछानेलगायतको उपस्थिति रहेको थियो ।
