लदी पर्वको अवसरमा माझी समुदायलाई सार्वजनिक बिदा
संवाददाता
बागमती प्रदेश सरकारले माझी समुदायको लदी (कोशी) पर्वको अवसरमा सार्वजनिक बिदा दिने निर्णय गरेको छ । शुक्रबार बसेको मन्त्रिपरिषद् बैठकले यही फागुन २० गते परेको लदी (कोशी) पर्वमा सार्वजनिक बिदा दिने निर्णय गरेको हो ।
प्रदेश सरकारका प्रवक्ता एवं आन्तरिक मामिला तथा कानुनमन्त्री सुरजचन्द्र लामिछानेका अनुसार बागमती प्रदेशमा माझी समुदायको बाक्लो उपस्थिति रहेकाले लदी (कोशी) पर्वका दिन सम्पूर्ण समुदायलाई सार्वजनिक बिदा दिने निर्णय गरिएको हो ।
यस्तै, बागमती प्रदेश सरकारले दुई कर्मचारीको बढुवा तथा पदस्थापन गर्ने निर्णय पनि गरेको छ । बैठकले संघीय सरकारबाट सरुवा भई आएका सहसचिव उदय रानामगरलाई पस्थापन गर्ने निर्णय गरेको छ भने प्रदेशका सिनियर डिभिजनल इन्जिनियर नवीन सिंहलाई ११औँ तह (सचिव)मा पढुवा गर्ने निर्णय गरेको हो ।
प्रदेश सरकारका प्रवक्ता एवं आन्तरिक मामिलामन्त्री लामिछानेका अनुसार बैठकले सहसचिव रानालाई प्रदेशको युवा तथा खेलकुद मन्त्रालयको सचिव पदमा कामकाजका लागि खटाउने निर्णय गरेको छ । उनले पूर्वाधार विकास कार्यालय ललितपुरमा कार्यरत उपसचिवस्तरका सिनियर डिभिजन इन्जिनियर सिंहलाई कार्यसम्पादन तथा योग्याताको आधारमा ११औँ तहमा बढुवा गर्ने निर्णय गरेको जानकारी दिए ।
बैठकले मण्डन देउपुर नगरपालिका र जापानको फुजी नोमिरा सहरबिच भगिनी सम्बन्ध स्थापनाका लागि सहमतिसहित संघीय सरकारमा सिफारिस गर्ने निर्णय गरेको छ । यसैगरी, बैठकले प्रदेश चलचित्र सम्बन्धमा व्यवस्था गर्न बनेको विधेयक संसदमा दर्ता गराउने निर्णय गरेको छ ।
उद्योग, वाणिज्य तथा प्रशासन मन्त्रालयको प्रविधि हस्तान्तरण कार्यविधि र तालिम सञ्चालसम्बन्धी कार्यविधि २०८१ स्वकीकृत गर्ने निर्णय गरेको हो । त्यस्तै, वनडढेलो सम्बन्धमा अस्ट्रेलियामा अध्ययन तथा अनुगमनका लागि प्रदेशको वन तथा वातावरण मन्त्रालयका सचिव केशव बरालको भ्रमण आदेश स्वीकृत दिने निर्णय पनि गरेको छ ।
