छुट्टाछुट्टै घटनामा मकवानपुरमा दुई जनाको मृत्यु
संवाददाता
मकवानपुरमा छुट्टाछुट्टै घटनामा परी दुईजनाको मृत्यु भएको छ। मोटरसाइकलमा सवार चितवनको रत्ननगर नगरपालिका– १६, पिठुवाका ५६ वर्षीय निमबहादुर थापाको ट्रकको ठक्करबाट र मकवानपुरको राक्सिराङ गाउँपालिका– ६, कोलडाँडाकी ४९ वर्षीया सीतामाया गलानको भिरबाट लडेर मृत्यु भएको प्रहरीले जनाएको छ।
मकवानपुर प्रहरीका अनुसार पूर्व-पश्चिम राजमार्गअन्तर्गत मनहरी गाउँपालिका– ७, मनहरी पुलमा चितवनबाट हेटौँडातर्फ आउँदै गरेको ना १६ प ३१८१ नम्बरको मोटरसाइकललाई सोही दिशाबाट आउँदै गरेको ना ६ ख ४०५५ नम्बरको ट्रकले ठक्कर दिँदा मोटरसाइकलको पछाडि सवार थापा घाइते भएका थिए।
उनको उपचारका क्रममा मनहरी अस्पतालमा मृत्यु भएको मकवानपुर प्रहरी प्रवक्ता डिएसपी श्यामु अर्यालले जानकारी दिए। यस्तै, मोटरसाइकलचालक सोही स्थानका ५५ वर्षीय रामजी गौतमको खुट्टामा चोट लागेको र उनलाई थप उपचारका लागि चिवतन रिफर गरिएको प्रहरीले जनाएको छ। ट्रक र ट्रकचालक बाराको जितपुर सिमरा उपमहानगरपालिका– २१, अम्लेसगन्जका ३९ वर्षीय ओमप्रसाद खनाल प्रहरी नियन्त्रणमा रहेको प्रवक्ता अर्यालले बताए।
यस्तै, राक्सिराङ– ६ कोलडाँडाकी ४९ वर्षीया सीतामाया गलानको भिरबाट लडेर मृत्यु भएको छ। प्रहरीका अनुसार सीता १७ गते शनिबार घरबाट घाँस काट्न जान्छु भनी हिँडेकोमा घर नफर्किएपछि खोजतलास गर्दा घरनजिकैको भिरमा मृत भेटिएकी थिइन्।
उनलाई खोजतलास गर्दै जाँदा घरदेखि १ किलोमिटर पश्चिमतर्फ रहेको सिलिंगे सामुदायिक वनको भिरबाट तल मृत अवस्थामा फेला परेको स्थानीयले बताएका प्रहरीले जनाएको छ। घटनाको बारेमा थाहा पाएपछि प्रहरी चौकी कान्द्राङ र मनहरीबाट गएको प्रहरी टोलीले घटनाको प्रारम्भिक अनुसन्धान थालेको प्रहरी प्रवक्ता अर्यालले बताए।
