निर्माण व्यवसायी राज्यका कारण पीडित : सिंह

निर्माण व्यवसायी संघ मकवानपुरको आयोजनामा ६ फागुनबाट सुरु भएको दोस्रो राष्ट्रिय निर्माण तथा व्यापार महोत्सवको आइतबार समापन गर्दै कार्यक्रमका प्रमुख अतिथिसमेत रहेका सिंहले निर्माण व्यवसायीहरू राज्यका कारण पीडित भएको दाबी गरे । उनले निर्माण कार्यको समयमा सिमेन्ट, छडलगायत सामग्रीमा भएको अस्वाभाविक मूल्यवृद्धि तथा काम गरेको भुक्तानी नपाउँदा व्यवसायी पीडित हुनुपरेको बताए ।

‘एकातिर काम गरेको पैसा पाउन सकिएको छैन, अर्कोतिर निर्माण सामग्रीमा भएको अस्वाभाविक मूल्यवृद्धिले निर्माण व्यवसायी मारमा परेका छौँ,’ उनले भने,  ‘सरकारले हाम्रो मर्का बुझेन । यसतर्फ राज्यले गम्भीर ढंगले ध्यान दिन जरुरी छ ।’ अध्यक्ष सिंहले अहिले निर्माण व्यवसायीले काम गर्ने वातावरण नै नभएको बताए । विश्वभर सफल भएका निर्माण व्यवसायीहरू नेपालमा काम गरेर असफल हुन पुगेको उनले दाबी गरे । पूर्वाधार र विकासमैत्री ऐन कानुनहरू नहुँदासम्म नेपालमा निर्माण कार्यहरू समयमा सम्पन्न हुन नसक्ने उनको भनाइ थियो ।

अध्यक्ष सिंहले राजनीतिक नेतृत्वहरूले स्रोतको सुनिश्चितताविना नै निर्वाचन क्षेत्रलक्षित योजना ल्याउने गरेको आरोप पनि लगाए । आर्थिक गतिविधिलाई चलायमान बनाउन निर्माण व्यवसायी संघ मकवानपुरले आयोजना गरेको महोत्सव सफल भएको भन्दै उनले खुसी व्यक्त गरे । उनले निर्माण व्यवसायीहरू सामाजिक उत्तरदायित्व वहन गर्न पनि सक्षम छन् भन्ने कुरा महोत्सवबाट पुष्टि भएको दाबी गरे ।

निर्माण व्यवसायी संघ मकवानपुरका अध्यक्ष बालगोपाल कँडेलले महोत्सवको एक लाखले अवलोकन गरेको र ६ करोड रुपैयाँबराबरको कारोबार भएको बताए । उनले महोत्सवबाट बचेको रकमलाई निर्माण व्यवसायी संघको नयाँ भवन निर्माणमा प्रयोग गरिने जानकारी दिए । महोत्सवमा निर्माण क्षेत्रमा प्रयोग हुँदै आएका अत्याधुनिक उपकरण र निर्माण सामग्रीको प्रदर्शनीसँगै बिक्रीलाई जोड दिइएको बताए । अध्यक्ष कँडेलले महोत्सवको माध्यमबाट निर्माण सामग्री उद्योगी, विक्रेता र उपयोगकर्ताबिच सोझो सम्पर्क हुनुका साथै यसबाट व्यवसाय वृद्धिसँगै उत्पादित वस्तुहरूको बजार प्रवर्द्धन र गुणात्मक प्रतिस्पर्धामा टेवा पुगेको विश्वास व्यक्त गरे ।